Mistökin

Í tilefni af nálægu afmæli Jónasar Hallgrímssonar langar mig að viðra umdeilda skoðun mína: Sjálfstæði íslendinga var mistök.  Við værum betur sett undir dönsku krúnunni (líkt og alþingismenn eru reyndar í orðins fyllstu merkingu).  Við værum til að mynda laus við þessa blessuðu krónu okkar sem er svo vonlaus að það má ekki einusinni tala um hana þá fellur hún.  Bjór væri seldur í öllum sjoppum, landsliðið okkar væri eiginlega alltaf á HM í fótbolta og við hefðum fagnað sigri í Júróvisjón hér um árið.  Við værum líka laus við alla rónanna.  Það er nefnilega miklu betra að vera róni í Köben heldur en Reykjavík.  Til eru dæmi um íslendinga sem flutst hafa "búferlum" til Hafnar í þeim tilgangi einum að verða rónar.

Við værum líka sameinuð þjóð.  Stoltir íslendingar undir hæl danska heimsveldissins, kúgaðir og niðurlægðir.  Andúðin á stjórnvöld grasseraði undir niðri, leynifundir haldnir um hvernig væri best að sprengja krúnuna og draga dannebro niður af stjórnráðinu.  Listir og menning myndu blómstra í ritskoðuðu alríki Margrétar.  Leynilegar leiksýningar þar sem helvítis drottningin væri hengd í hverri sýningu og kalhæðin skilaboð sem sýndu eitraðan húmor íslendinga yrðu daglegt brauð á veggjum borgarinnar.  Við hefðum sameiginlegt markmið, eitthvað til að berjast fyrir....Sjálfstæði!  Því ekki myndum við sætta okkur við að vera danir.  Danir eru leiðinlegir, allavega ekkert ligeglad.  Danir eru bara latir þjóðverjar. 

Íslendingar þyrftu nefnilega á smá flís í annan fótinn að halda, eitthvað sem minnir okkur á að lífið er erfitt.  Góðærisfyllerý síðustu ára hefur blindað okkur öll.  Við setjum heimsmet í að kaupa leikföng þegar ný dótabúð opnar, ekki af því að þau séu eitthvað ódýrari þar en annarsstaðar, búðin er bara svo stór.  Undirskriftarlistar fara í gang þegar hjálpa á heimilislausu fólki af götunni ("alveg nauðynlegt en bara ekki í minni götu")  og Davíð Oddson líkir verðbólgustríðinu við Þorskastríðið, "stríð sem að við höfum ekki efni á að tapa". 

Mikið væri gaman ef að þjóðfélagsumræðan myndi ekki snúast um peninga á einn eða annan hátt heldur eitthvað stærra og göfugra...